Кык воргоронъёс пумиськиллям:

– Василий, мар сылӥськод? Ух ты, чебер костюмен, галстукен. Кытчы пормытскид?

– Да, кышноелэн вордскем нуналыз. Мар ке но сыӵе... вот сыӵезэ... туж ӟечсэ басьтоно вал солы, но укыр дуно но медаз луы.

– Маро нош, ческыт зын ву басьты, соос ярато ук. Сэре асьмеос но поди пичинэ пусъём вордскем нуналзэ. Мон лавкае бызьыло.

– Дугды, али, эн дырты. Ческыт зын ву мон солы кышнояськон азям кузьмай. Уз тупа. Ну, сыӵезэ... э-эх, сыӵе мед луоз, Маняе шум мед потоз.

– Так, так, соку дӥсь пӧлысь маке басьты, кофта порма.

– Да, вань солэн, ӟеч ай, дас вить ар улӥськом ини, нош солэн весь выль кадь ай, пась луэ ке, со сыӵе чебер сяська кышъет пуктэ, уката вольыт луэ, возьвыл сяська кадь. Зарни киосыз Манялэн. Со ведь, мынам, сыӵе, сыӵе... ява. Уксёез кияз луэ ке, пиналъёслы, весь пиналъёслы басьяське, корка котырлы. Тани мыным но туннэ костюмдэ, пе, дӥся, Васи, чылкыт кариськы, нош аслыз ноку номыр бастэмез но, куремез но ӧвӧл. Вот кыӵе со мынам.

– Ма сыӵелы зарни сӥньысэн вурем пыдкутчан но жаль ӧвӧл.

– Вань, вань солэн пыдкутчанэз, ӟеч ай. Ну, каблукъёсыз усизы ни, но тапочки интыын туж умой шуэ. Пыдъёс но уг жадё, пе. Мар, мар меда кузьмалом?

– Нош ачиз кышноед кылсярысь, яке лушкем, яке тынад валамедъя мар кулэ каре кадь.

– Ну весь лякытэн, нуналлы быдэ кадь: «Васи, лапас лэсьтоно вал, туж умой луысал коргид вӧзы лапас». Вить ар озьы вера ини. Нош мон лэсьто шуисько, уксё но люкай ини. Вот, лапаслы шуыса али кортӵог дас кило басьто. Мание, ну шумпотоз та лапас борды кутске ини шуыса. Пичи праздник шуыса курытсэ но луоз веръяны. Вот кузьым ке кузьым. Вань кузьымъёслы – кузьым! Юнме уг шуо: «пиосмурт – йыр, кышно – чырты»!

Нина Афонова.